Portada da web actualizada da orquestra Pontevedra
A orquestra PONTEVEDRA xa está levando a festa ás súas primeiras citas da nova temporada, con case ningún cambio nos compoñentes, só un, e a mesma filosofía de sempre: facer unha boa festa con música de baile.
O único cambio referente ao plantel de músicos dáse no saxo: abandonou o saxofonista José Manuel González, que continuará cos seus estudos no Conservatorio Superior de Jazz da Coruña, e o seu lugar foi ocupado por Ossiel (ex PHILADELPHIA). O novo músico da orquestra PONTEVEDRA contribuirá como saxo alto, saxo tenor, teclados e, sobre todo, moitas ganas de afrontar a nova temporada na formación pontevedresa.
Polo tanto, salvo a entrada de Ossiel, o resto do plantel de músicos e cantantes continúa igual: Ángel Barry – voz; Mili – voz; Ander – voz; Jacobo – teclados, acordeón e voz; Álex – batería, Suso – guitarras e voz, Alberto – baixo, Gelsys – percusión e voz, Manu – trompeta e José Manuel – trombón. Tamén continúa o mesmo equipo técnico, vital en calquera orquestra.
Para a xira 2010 a orquestra PONTEVEDRA seguirá, en palabras da dirección, “coa súa filosofia de música de baile. Estamos traballando nun novo repertorio buscando sempre que sexa moi bailable e ofrecendo en momentos puntuais da actuación algún tema de lucimento e especial calidade”.
E non rematan aquí as novidades, porque “é probable que o noso escenario sufra algunhas reformas para intentar ofrecerlle ao noso público algún detalle novo. Tamén estamos traballando nun novo traballo discográfico da orquestra PONTEVEDRA”.
Para rematar, a formación musical tamén nos ofrece de novo a súa páxina web actualizada. Alí pódense consultar diversos apartados que se irán actualizando temporalmente, con fotos, vídeos, compoñentes, a historia da orquestra e, como non, o calendario de actuacións.
A falta tan só do novo cartel da orquestra PONTEVEDRA 2010, que será presentado en breve (o que aparece na páxina web é o de 2009), a formación musical afronta unha nova etapa caracterizada polos mínimos cambios na formación, o que lle dá unha estabilidade envexable, e anuncia cambios importantes no repertorio así como un novo CD para levar sempre a música bailable desta formación pontevedresa.
