A orquestra Ipanema foi unha das que actuou nas festas da Saleta, en Cea
A Comisión de Festas de Cea envíanos varias fotografías da celebración máis importante da localidade: A Saleta, que vén de celebrarse hai uns días. Segundo a comisión, o éxito das festas foi rotundo, como vén sendo habitual, co engadido de que as orquestras deste ano non pertencían á axencia que habitualmente traballa nestas festas. En palabras da comisión de festas: “Todas as orquestras estiveron á altura, sobre todo ARMONÍA SHOW e POCEIRO tiveron un éxito tremendo. Gustaron tamén moito TANGO e o grupo AMÉRICA, sorprendendo este último cun primeiro pase moi bailable”.
Segundo o membro da comisión que nos envía a información, pode que a orquestra que menos gustase fose IPANEMA, xa que esta formación musical move un escenario xigante que creou moitas expectativas entre os veciños e ademais o son non era o mellor. De todas formas houbo moita xente á que si lle gustou o espectáculo desta orquestra leonesa.
Os membros da Comisión de Festas de Cea xa están a traballar para preparar as do ano que vén. Podemos adiantar que xa hai dúas orquestras contratadas, das denominadas “grandes”. Pronto poderemos desvelar os nomes.
Desde Festa a Festa agradecemos á Comisión toda a información enviada.