A orquestra Aché en Parada, Ordes, o día da estrea do novo escenario /© Fotografía: roxegar 2010
ACHÉ está que corta coa pana. O traballo inxente dos compoñentes da orquestra de Vilanova de Arousa por colocala en postos destacados dentro do mundo das orquestras está dando os seus froitos: novo repertorio, nova páxina web actualizada, estrea de escenario, continuas actividades promocionais… e agora o CD e mais o vídeoclip.
E non será unha presentación de calquera xeito; non, nin moito menos. Pensando nos seguidores da orquestra, que cada día son máis, ACHÉ ofrece unha presentación do seu CD Celebra la vida como as grandes estrelas da música; cunha actuación en directo onde interpretarán os temas ante aqueles que se queiran achegar mañá día 29 á sala Chanteclair de Valga. Alí tamén se proxectará o vídeo que fora gravado hai uns meses en Cambados en compañía de amigos compoñentes doutras formacións musicais.
E tamén haberá sesión de fotos cos fans, entre outras cousas. A entrada é gratuíta para os seguidores con carné ou apuntados aínda que non lles chegase. Será unha noite de grandes sorpresas e, desde logo, diferente ás demais.
ACHÉ significa sorte, e moito aché lle desexamos á orquestra, aínda que todo o que están consegindo non é máis que froito do traballo constante e a recompensa merecida, a calor e o recoñecemento do público, están máis que gañados.
Agora podes celebrar a vida con ACHÉ co traballo discográfico con 10 temas de todos os estilos, que será presentado nunhas horas por todos os compoñentes da orquestra nunha actuación moi especial.
