Desde o pasado 16 de xullo pódese gozar do completo programa das festas do Apóstolo en Compostela. As máis importantes do concello levaranse a cabo ata o día 31.
Tres orquestras serán as encargadas de amenizar as verbenas na Alameda santiaguesa. GRAN CANARIA hoxe sábado coincidindo co concerto de LAMATUMBÁ na Quintana, a CHARLESTON BIG BAND mañá domingo coincidindo con outro concerto, esta vez de MILLADOIRO (tamén na Quintana) e a SUAVECITO o último día de celebracións, coincidindo cun dos concertos máis importantes desta edición, o de JEAN-MICHEL JARRE no Obradoiro.
Xa pasaron por Compostela artistas do nivel de MELENDI ou BEBE, aínda que faltan algúns outros como PEREZA, ELVIS COSTELO ou DIANA KRALL. Mención á parte merece a figura de MARK KNOPFLER, que actuará no Multiusos Fontes do Sar o mércores 28.
E non hai festa sen fogos artificiais. Nada máis e nada menos que sobre 360.000 euros en pirotecnia se gastarán en Compostela os días 24 e seguintes ata o 31. O esforzo do Xacobeo e mais do Concello permite que este ano as sesións pirotécnicas sexan de excepción, como en cada ano Xacobeo, e así haxa réplicas, a partir do día 25 e ata o 31, da gran sesión da noite do 24.
As atraccións de Santa Susana, as orquestras na Alameda, concertos na Quintana, Obradoiro ou Sar e un completo programa de actividades lúdicas confeccionan un cartel moi interesante un ano máis en Compostela. Que se note que é a capital…
A orquestra Gran Canaria na Alameda e Lamatumbá na Quintana, hoxe en Compostela
A orquestra padronesa Charleston Big Band será a encargada da verbena na Alameda mañá domingo. Na Quintana, concerto de Milladoiro
A orquestra Suavecito cerrará as verbenas da Alameda o día 31. Esa noite no Obradoiro, Jean-Michel Jarre en concerto
Pódese consultar o programa completo das festas do Apóstolo na páxina web do concello de Santiago de Compostela.
