As orquestras Aché e Olympus actuarán na xornada do domingo en pases de mediodía e tarde na XXVII edición da Festa da Filloa de Lestedo, Boqueixón
Chega nunhas horas a cita festeira e gastronómica por excelencia este mes en Boqueixón, concello próximo á capital galega. Concretamente en Lestedo, a xornada dominical estará marcada pola tradición gastronómica e a música de verbena a cargo das orquestras ACHÉ e OLYMPUS.
A de Lestedo é unha cita que exalta un dos produtos máis típicos destas datas en Galicia: a filloa. Xa está todo preparado para acoller a gran xornada festiva que será a número 27 e está xa moi consolidada non só no concello senón en toda a comarca. A partir das once da mañá comezan os actos programados coa música de cinco charangas: O Recobio, Os gaiteiros do Pedroso, Os que hai, A requinta de Xián e Charanga.es, que amenizarán coa súa música durante todo o día.
Ás 13.30 horas será o pregón, a cargo de María Mera, actriz galega moi coñecida (Matalobos) e veciña do municipio de Boqueixón. Tamén haberá “loitas dialécticas” da man de catro parellas de xenerais que serán os protagonistas dos tradicionais atranques.
E a música de verbena comezará ás 14:00 horas e prolongarase ata a noite, da man de dúas orquestras da axencia de espectáculos Lito: OLYMPUS e ACHÉ. A primeira acaba de presentar novo disco, O final do camiño, e a segunda prosegue coa súa nova xira Celebra la vida, na que pouco a pouco se van presentando as novidades ata conformar o que será o espectáculo do próximo verán. En Lestedo comezará ACHÉ e proseguirá OLYMPUS en dous pases cada unha delas.
A vindeira cita festeira en Boqueixón será a finais do mes de marzo coa Festa da Mocidade, pero de momento imos gozar da XXVII edición da Festa da Filloa.
Olympus repetirá en marzo no concello de Boqueixón na Festa da Mocidade con outras dúas orquestras