Clica na imaxe para vela a maior tamaño
E continúan as festas no concello de Dodro. Despois das patronais na cabeceira do municipio e, hai uns días, as de Lestrove, tócalle agora a Imo, con tres xornadas festivas que comezan hoxe. En Imo-Castro hoxe haberá unha gran mexilloada e a música dunha discoteca móbil. Mañá comezan as verbenas con dúas orquestras ben asentadas no panorama orquestreiro aínda que bastante distintas entre elas: ACHÉ e PANAMÁ. A primeira delas, a considerada orquestra revelación, cun repertorio moi completo: cumbia e merengue, basicamente, no primeiro pase, con baladas, pasodobles, etc., e un segundo pase máis encauzado á xuventude pero no que se tocan todos os estilos musicais, incluídos os éxitos discotequeiros do momento.
PANAMÁ é unha orquestra máis de baile aínda que tamén fai algún tema de pop actual. Neste sentido é unha orquestra un pouco máis clásica aínda que non por iso deixa de ter moita calidade. En todo caso as dúas orquestras compleméntanse perfectamente e han facer unha boa noite de festa.
Para o cerre en Imo-Castro, outra boa banda musical: JERUSALÉN, acompañada de CICLÓN. O grupo compostelán segue arrasando alá por onde vai e a orquestra liderada por Jorge Meléndez traerá o seu repertorio que toca todos os estilos bailables e ademais temas de exhibición vocal. Outra boa combinación para darlle un bo peche ás festas 2010. Será estes días, outra vez máis, no concello de Dodro.