A orquestra París de Noia actuou o pasado domingo na V Festa da Xuventude de Val (Agolada) xunto coa Panorama /© fotografía roxegar 2010
A pasada fin de semana tiveron lugar algunhas festas que xa gozan de moita sona entre os festeiros e en todas elas o resultado foi positivo. Coa axuda do bo tempo podemos falar de éxito nas pasadas convocatorias festeiras. Algunhas das máis importantes foron estas: V Festa da Xuventude de Val (Agolada), XX Festa da Tortilla Xigante (Carcacía – Padrón), I Festa da Xiba (Sada), Ascensión en Santiago de Compostela ou a VIII Festa do pan de Carral.
En Val, Agolada, unha pequena aldea de pouco máis de trinta casas e sesenta veciños, dos cales a metade están na Comisión de Festas, van polo quinto ano de celebración da súa Festa da Xuventude. Repetiron dúas das máis grandes: PARÍS DE NOIA e PANORAMA. En 2008 contabilizáronse 4.000 asistentes e en 2009 máis de 5.000. Este ano a cifra supera as 7.000 persoas e máis de 1.200 coches.
En Carcacía a tortilla xigante volveu facerse realidade. Estrea de tixola e pregón de luxo a cargo de Marcial Mouzo. A música púxoa o grupo LA OCA. Debido ao esforzo tan grande que hai que facer para un evento destas características e que Carcacía é un sitio pequeno, esta festa gastronómica non se celebrou todos os anos desde o seu nacemento; pero en 2010 decidiuse seguir con esta festa e mesmo estrear tixola. Para cociñar os 1.500 quilos de patacas e 8.000 ovos precisouse o lume de oito bombonas de butano e para darlle a volta á tortilla, un guindastre de grandes dimensións.
En Sada naceu o pasado domingo unha nova festa. Por se eran poucas as que xa hai -as máis importantes son as patronais a mediados de agosto onde se inclúe a famosa sardiñada o día 18- a partir de agora haberá que sumar unha máis no calendario. E a xulgar polo resultado e en palabras do propio alcalde, esta cita gastronómica pretende continuar cada ano a partir de agora. Máis de 500 quilos de xiba dan para moita festa…
En Compostela a Ascensión colgou o cartel de cheo, tanto nos concertos do Campus Vida como nas verbenas da Alameda. Os encargados de cerrar os bailes foron os compoñentes do grupo ALCOTÁN. O luns, Día das Letras e día de reivindicación, as atraccións fixeron descontos. Os carruseis aínda funcionarán durante toda esta semana, incluída a noria xigante que coroa Santa Susana e desde onde se poden divisar unhas impresionantes vistas de Santiago e arredores.
E en Carral a Festa do Pan chegou á súa VIII edición e aumentou un día de festa, pasando a tres. LA BÁMBOLA foi a orquestra encargada do baile do domingo. Aproveitouse a festa por parte dalgúns colectivos para reivindicar obras, no caso dos pais que pedían que comezasen as obras do novo instituto ou a subestación eléctrica, ou para mostrar o desacordo con outras: non ao AVE por Carral. Con todo, hai que falar novamente de éxito rotundo da festa carralesa.
A nova fin de semana vén marcada polas festas de Santa Rita en diversas localidades galegas das que daremos conta así como as do Espírito Santo noutros tantos lugares.
